Nieman kann mit gerten


Nieman kann mit gerten

kindes zuht beherten:

den man zêren bringen mac,

dem ist ein wort als ein slac.

dem ist ein wort als ein slac,

den man zêren bringen mac:

kindes zuht beherten

nieman kann mit gerten.

 

Hüetet iuwer zungen:

daz zimt wol den jungen.

stôz den rigel vür die tür,

lâ kein bœse wort dar vür.

lâ kein bœse wort dar vür,

stôz den rigel vür die tür:

daz zimt wol den jungen.

hüetet iuwer zungen.

 

Hüetet iuwer ougen

offenbare und tougen,

lât si guote site spehen

und die bœsen übersehen.

und die bœsen übersehen

lât si guote site spehen:

offenbare und tougen

hüetet iuwer ougen

 

Hüetet iuwer ôren,

oder ir sît tôren.

Lât ir b&aoelig;siu wort dar in,

daz gunêret iu den sin,

daz gunêret iu den sin,

lât ir bœsiu wort dar in.

oder ir sît tôren,

hüetet iuwer ôren,

 

Hüetet wol der drîer

leider alze vrîer.

zungen ougen ôren sint

dicke schalchaft, zêren blint.

dicke schalchaft, zêren blint

zungen ougen ôren sint

leider alze vrîer

hüetet wol der drîer.



(* 1170-00-00, † 1230-00-00)



Weitere gute Gedichte von Walther von der Vogelweide zum Lesen.